മാര്‍ക്ക് സുക്കെര്‍ബെര്‍ഗ് പാപ്പായെ സന്ദര്‍ശിച്ചു
സാമൂഹ്യവിനിമയശൃംഖലയില്‍ ഒന്നാംസ്ഥാനത്തു നില്ക്കുന്ന ഫെയ്സ്ബുക്കിന്‍റെ പഞ്ചസ്ഥാപകരില്‍ ഒരാളും മേധാവിയുമായ മാര്‍ക്ക് സുക്കെര്‍ബെര്‍ഗിന് പാപ്പാ വത്തിക്കാനില്‍ ദര്‍ശനം അനുവദിച്ചു.
തിങ്കളാഴ്ചയായിരുന്നു(29/08/16) ഫ്രാന്‍സീസ് പാപ്പായും സുക്കെര്‍ബെര്‍ഗും തമ്മിലുള്ള കൂടിക്കാഴ്ചയെന്ന് പരിശുദ്ധസിംഹാസനത്തിന്‍റെ വാര്‍ത്താകാര്യാലയത്തിന്‍റെ മേധാവി ഗ്രെഗ് ബര്‍ക്ക് ഈ കൂടിക്കാഴ്ചയെ അധികരിച്ചു പുറപ്പെടുവിച്ച പ്രസ്താവനയില്‍ വെളിപ്പെടുത്തി.
ദാരിദ്ര്യ നിര്‍മ്മാര്‍ജ്ജനം, സമാഗമസംസ്കൃതിയുടെ പരിപോഷണം, പ്രത്യാശയുടെ സന്ദേശ സംവേദനം, പ്രത്യേകിച്ച് ഈ സന്ദേശം കൂടുതല്‍ ദുരിതമനുഭവിക്കുന്നവരില്‍ എത്തിക്കല്‍ എന്നിവയ്ക്കായി വിനിമയസാങ്കേതികവിദ്യ എപ്രകാരം പ്രയോജനപ്പെടുത്താം എന്നതിനെക്കുറിച്ചു പാപ്പായും സുക്കെര്‍ബേര്‍ഗും തമ്മില്‍ ചര്‍ച്ചചെയ്തുവെന്ന് ഗ്രെഗ് ബര്‍ക്കിന്‍റെ ഈ പ്രസ്താവനയില്‍ കാണുന്നു.
പാപ്പായുമായുള്ള കൂടിക്കാഴ്ചയ്ക്കെത്തിയ മാര്‍ക്ക് സുക്കെര്‍ബെര്‍ഗിനൊപ്പം അദ്ദേഹത്തിന്‍റെ പത്നി പ്രിഷീല്ല ചാനും ഉണ്ടായിരുന്നു.
2004 ഫെബ്രുവരി 4 നാണ് ഫെയ്സ്ബുക്ക് സ്ഥാപിതമായത്. അമേരിക്കന്‍ ഐക്യനാടുകളിലെ കാലിഫോര്‍ണിയ ആസ്ഥാനമായുള്ള ഫെയ്സ്ബുക്കിന്‍റെ ഉപഭോക്താക്കള്‍ പ്രതിമാസം 110 കോടിയാണെന്നു കണക്കാക്കപ്പെടുന്നു.
എഡ്വേര്‍ഡ് സവെരിന്‍,ആന്‍ഡ്രൂ മക്കോളം, ഡസ്റ്റിന്‍ മോസ്ക്കൊവിറ്റ്സ്, ക്രിസ് ഹ്യൂഗെസ് എന്നിവരാണ് ഫെയ്സ്ബുക്കിന്‍റെ സഹസ്ഥാപകര്‍.
| All the contents on this site are copyrighted ©. |