സീറോ-മലബാര്‍ സഭായോഗം കൊടകരയില്‍ സംഗമിക്കും
സീറോ മലബാര്‍ സഭായോഗം കൊടകരയില്‍...! സഭാദ്ധ്യക്ഷന്‍ കര്‍ദ്ദിനാള്‍ ജോര്‍ജ്ജ് മാര്‍ ആലഞ്ചേരി ഉത്ഘാടനംചെയ്യും. ആഗസ്റ്റ് 26-ാം തിയതി വെള്ളിയാഴ്ച ആരംഭിക്കുന്ന യോഗം (Archiepiscopal Assembly) 28-ാം തിയതി ഞായറാഴ്ച സമാപിക്കും. തൃശ്ശൂര്‍ ജില്ലയിലെ കൊടകരയിലുള്ള സഹൃദയ എഞ്ചിനീയറിങ് കോളെജ് ക്യാമ്പസിലാണ് സീറോമലബാര്‍ സഭായോഗം ചേരുന്നത്. യോഗത്തില്‍ 21 രാജ്യങ്ങളില്‍നിന്നുള്ള സഭയുടെ പ്രതിനിധികള്‍ പങ്കെടുക്കും.
കാനോനിക സ്വഭാവമുള്ളതും, അല്‍മായര്‍ ഉള്‍പ്പെടെ, എല്ലാതലങ്ങളിലുമുള്ള സീറോ-മലബാര്‍ വിശ്വാസികളുടെ പ്രതിനിധി സംഘങ്ങളുടെ കൂട്ടായ്മയാണ് സഭായോഗം. അഞ്ചുവര്‍ഷം കൂടുമ്പോള്‍ സംഗമിക്കുന്ന സഭായോഗത്തിന്‍റെ 4-ാമത്തെ കൂട്ടായ്മയാണ് കൊടകരയില്‍ സംഗമിക്കുന്നത്. കാലികമായ സാമൂഹ്യ ചുറ്റുപാടുകളോടു ക്രിസ്തീയമായി പ്രതികരിക്കാന്‍ ജീവിത ലാളിത്യം, കുടുംബങ്ങളുടെ സാക്ഷ്യം, പ്രവാസികളുടെ ദൗത്യം എന്നീ വിഷയങ്ങള്‍ യോഗം ചര്‍ച്ചാവിഷയമാക്കുമെന്ന്, സീറോമലബാര്‍ സഭായോഗത്തിന്‍റെ മാധ്യമവിഭാഗം ആഗസ്റ്റ് 24-ന് ഇറക്കിയ പ്രസ്താവനയിലൂടെ അറിയിച്ചു.
കാക്കനാടുള്ള സീറോ മലബാര്‍ സഭാ ആസ്ഥാനത്ത്, സെന്‍റ് തോമസ് മൗണ്ടില്‍ സമ്മേളിച്ചിരിക്കുന്ന സഭാപിതാക്കന്മാരും സമ്മേളനത്തില്‍ പങ്കെടുത്ത് ബലിയര്‍പ്പിക്കുകയും, പഠനവിഷയങ്ങളെക്കുറിച്ച് അവരെ ഉദ്ബോധിപ്പിക്കുകയും, ചിന്തകള്‍ പങ്കുവയ്ക്കുകയും ചെയ്യുമെന്ന് പ്രസ്താവന വ്യക്തമാക്കി.
| All the contents on this site are copyrighted ©. |